शे–फोक्सुन्डो यात्रामा ६ भारतीय पर्यटक बेपत्ता, भारी हिमपातले खोजी कठिन

नेपालको सबैभन्दा गहिरो ताल शे–फोक्सुन्डो जाने यात्रामा रहेका ६ जना भारतीय पर्यटक भारी हिमपातपछि सम्पर्कविहीन भएका छन्। समाचार संस्था ANI का अनुसार बेपत्ता हुनेमा दुई महिला र चार पुरुष छन्। उनीहरू डोल्पा बुद्ध गाउँपालिकाको वडा नं. ४ र ८ हुँदै शे–फोक्सुन्डो तालतर्र्फ जाँदै थिए।

पर्यटकहरू शे–फोक्सुन्डो गाउँपालिकाको वडा नं. ४ र ८ बीचका नुम्ला पास र बाग्ला पास क्षेत्रमा सम्पर्कविहीन भएको अधिकारीहरूले बताएका छन्। बंगालको खाडीमा बनेको चक्रवात अर्णवको प्रभावले हिमाली क्षेत्रमा भारी हिमपात भएको र उनीहरू फर्कने क्रममा हिउँमा फसेको हुन सक्ने स्थानीय गाइडहरूको अनुमान छ।

चेतावनी हुँदाहुँदै अघि बढेका थिए

डोल्पाका प्रमुख जिल्ला अधिकारी जुनु हमालले पर्यटकहरू धोबाट फोक्सुन्डोतर्फ फर्कने क्रममा फसेको पुष्टि गरिन्। उनका अनुसार स्थानीयले मौसम र बाटोको कठिन अवस्थाबारे चेतावनी दिए पनि पर्यटकहरू यात्रा अघि बढेका थिए।

शे–फोक्सुन्डो गाउँपालिकाका अध्यक्ष धावा साम्दुक गुरुङले वडा नं. ४ र ८ बीचका पासहरूमा मोबाइल सञ्चार उपलब्ध नभएकाले पर्यटकहरूको अवस्था थाहा पाउन कठिन भएको बताए।

खोजी र उद्धार जारी

डोल्पाका प्रहरी नायब उपरीक्षक अनिलराज गिरीका अनुसार पछिल्लो जानकारीसम्म ६ जना पर्यटक सम्पर्कमा छैनन् र खोजी तथा उद्धारका लागि सम्बन्धित निकायसँग हेलिकप्टर व्यवस्था गर्न माग गरिएको छ। नेपाली सेनाको टोली पनि खोजीमा खटिएको ANI ले जनाएको छ, तर भारी हिमपात र खराब मौसमले खोजी कठिन बनेको छ।

जिल्ला प्रशासन कार्यालयका अनुसार माथिल्लो डोल्पामा हाल २४४ पर्यटक पुगेका छन् — तिनमा १४९ नेपाली, ४४ सार्क मुलुकका र ५१ अन्य विदेशी नागरिक छन्। प्रशासनले पर्यटकलाई जोखिमयुक्त क्षेत्र नजान र सुरक्षित ठाउँमै बस्न आग्रह गरेको छ।

शे–फोक्सुन्डो तालमा पर्यटक आगमन बढ्दो छ — आर्थिक वर्ष २०८२/८३ को पहिलो ११ महिनामा ४,८८२ पर्यटकले ताल भ्रमण गरेका थिए।