सोसल सेक्युरिटी २०२७ मा ३.६ प्रतिशतले बढ्ने, कहिलेदेखि?

अमेरिकामा सोसल सेक्युरिटी (Social Security) वा SSI पाउने आमाबुबा, हजुरआमा-हजुरबुबा र अपांगता भएका व्यक्तिका लागि राम्रो खबर छ। सोसल सेक्युरिटी प्रशासन (SSA) ले अक्टोबर १४ मा घोषणा गरेअनुसार २०२७ मा भुक्तानी ३.६ प्रतिशतले बढ्नेछ। यसलाई Cost-of-Living Adjustment (COLA) भनिन्छ, अर्थात् महँगी बढेअनुसार भुक्तानी मिलाउने व्यवस्था।

कहिलेदेखि बढ्छ?

SSA का अनुसार:

• सोसल सेक्युरिटी पाउनेको बढेको रकम जनवरी २०२७ देखि आउँछ।
• SSI पाउनेको बढेको भुक्तानी डिसेम्बर ३१, २०२६ देखि सुरु हुन्छ।
• अवकाश (retirement) सुविधा पाउनेको औसत भुक्तानी महिनामा करिब $७५ ले बढ्नेछ।

काम गर्नेलाई के असर?

सोसल सेक्युरिटी कर लाग्ने अधिकतम आम्दानी (taxable maximum) २०२७ मा $१,८४,५०० बाट $१,९२,३०० पुग्ने SSA ले जनाएको छ। यसभन्दा बढी कमाउनेले यस सीमासम्मको आम्दानीमा मात्र सोसल सेक्युरिटी कर तिर्छन्।

आफ्नो नयाँ रकम कसरी थाहा पाउने?

• SSA ले सबैलाई हुलाकबाट सूचना पठाउँछ।
• my Social Security अनलाइन खाता खोलेर डिजिटल सूचना छान्नुभयो भने हुलाकभन्दा करिब तीन हप्ता अघि नै आफ्नो नयाँ रकम हेर्न सकिन्छ। यसका लागि नोभेम्बर १८, २०२६ भित्र दर्ता गर्नुपर्छ।
• २०२७ को रकम नोभेम्बरको अन्त्यतिर my Social Security खाताको Message Center मा देखिनेछ।
• Medicare का २०२७ का परिवर्तन Medicare को वेबसाइटमा छुट्टै आउनेछन्।

ठगीबाट सावधान

"COLA पाउन तपाईंको खाता अपडेट गर्नुहोस्" भन्दै आउने फोन, टेक्स्ट वा इमेलमा आफ्नो सोसल सेक्युरिटी नम्बर वा बैंक विवरण नदिनुहोस्। जानकारी चाहिए ssa.gov मा मात्र जानुहोस्।